ბაქოში ქართველი და აზერბაიჯანელი ჟურნალისტების მონაწილეობით მედიაფორუმი გაიმართა

ბაქოში ქართულ-აზერბაიჯანული მედიაფორუმი გაიმართა თემაზე: „მედიის როლი საზოგადოებრივი ნდობისა და ინფორმაციული უსაფრთხოების ჩამოყალიბებაში“.

ღონისძიების გახსნის ცერემონიაზე სიტყვით გამოსვლისას, მედიის განვითარების სააგენტოს აღმასრულებელმა დირექტორმა, აჰმად ისმაილოვმა აღნიშნა, რომ ორ ქვეყანას შორის ინფორმაციის გაცვლის სისტემატური გაფართოება, მედიასუბიექტებს შორის ურთიერთნდობის განმტკიცება და საერთო საკომუნიკაციო დღის წესრიგის ფორმირება განსაკუთრებული მნიშვნელობისაა რეგიონში სტაბილურობისა და მდგრადი განვითარებისთვის.

მან ასევე ხაზგასმით აღნიშნა, რომ დიგიტალიზაცია და სოციალური ქსელების სწრაფი განვითარება მნიშვნელოვნად ზრდის ინფორმაციის ნაკადს, კიდევ უფრო აძლიერებს პროფესიონალური მედიის როლს და აუცილებელს ხდის ინფორმაციული უსაფრთხოების პოლიტიკის ეფექტურ განხორციელებას.

ფორუმის პირველი პანელური სესია მიეძღვნა თემას - „მედიის ეკოსისტემის გაძლიერება ინფორმაციული უსაფრთხოების უზრუნველსაყოფად“.

დისკუსიას, რომელსაც აუდიოვიზუალური ტექნოლოგიების საბჭოს აპარატის უფროსი ფაზილ ნოვრუზოვი უძღვებოდა, ესწრებოდნენ ტელეარხ ARB 24-ის აღმასრულებელი დირექტორი რადიკ ისმაილოვი, ქართული გადაცემის „ევროკრატია - ძველი ევროპა“ წამყვანი იოანე შაიშმელაშვილი, მედიის განვითარების სააგენტოს იურიდიული დეპარტამენტის ხელმძღვანელი ადილ ტაგიევი და საქართველოს საზოგადოებრივი ტელევიზიის „ფერადი საქართველოს“ პროექტის ხელმძღვანელი, ჟურნალისტი და ტელეწამყვანი რამილია ალიევა. ქართულ დელეგაციაში ღონისძიებაზე დამსწრეთა შორის ასევე სხვადასხვა ქართული მედიაპლატფორმების წარმომადგენლებიც იმყოფებოდნენ: "რეპორტიორი", „ჯორჯიან-თაიმსი“, „ნიუსჰაბი“, „ინფო 9“, „ლიდერი“ და სხვ. ფორუმს ასევე ესწრებოდნენ საქართველოს ჟურნალისტთა ფედერაციის თავმჯნომარე გიორგი მამაცაშვილი, ჟურნალისტი ზვიად ავალიანი და იუსტიციის სამინისტროს ინფორმაციული უსაფრთხოების დეპარტამენტის წარმომადგენელი, პოლიტიკის მეცნიერების დოქტორი, თორნიკე ზედელაშვილი.

დისკუსიის ფარგლებში ფართოდ განიხილეს მოსაზრებები ისეთ საკითხებზე, როგორიცაა ტექნოლოგიური ევოლუციის მრავალმხრივი გავლენა მედია გარემოზე, ინფორმაციის სანდოობის დაცვა, სოციალური მედიის ინფორმაციის ერთ-ერთ მთავარ წყაროდ გარდაქმნა და ციფრული ინსტრუმენტების საშუალებით სხვადასხვა აუდიტორიასთან უფრო ეფექტური კომუნიკაციის დამყარება.

მეორე პანელურ სესიას თემაზე „ერთობლივი თანამშრომლობა ჟურნალისტების პროფესიონალიზმისა და საზოგადოების მედიაწიგნიერების გაუმჯობესების საქმეში“, უძღვებოდა მედიის განვითარების სააგენტოს ნახიჩევანის რეგიონული ოფისის ხელმძღვანელი ვაფა ისგანდაროვა.

მომხსენებლებს შორის იყვნენ ლემან ისგანდაროვა, სააგენტოს მედიის მხარდაჭერის პროექტების, სტრატეგიული დაგეგმვისა და საინფორმაციო ტექნოლოგიების დეპარტამენტის დირექტორი; გრიგოლ რობაქიძე, უნივერსიტეტის ჰუმანიტარულ და სოციალურ მეცნიერებათა სკოლის პროფესორი; მაია პაჭკორია, მულტიმედიური ცენტრის ხელმძღვანელი; ვუგარ ზიფაროღლუ, ბაქოს სახელმწიფო უნივერსიტეტის ჟურნალისტიკის ფაკულტეტის დეკანი და გია აბაშიძე, ქართული სატელევიზიო არხის PosTV-ის ანალიტიკური ჯგუფის წარმომადგენელი, რომლებმაც გაუზიარეს თავიანთი შეხედულებები ჟურნალისტების პროფესიონალიზმის გაუმჯობესების, საზოგადოებაში მედიაწიგნიერების გაზრდისა და ამ სფეროში ორმხრივი თანამშრომლობის როლის შესახებ.

პანელის მონაწილეებმა ხაზი გაუსვეს, რომ დღევანდელ საინფორმაციო გარემოში მედიის მზარდი პასუხისმგებლობის გათვალისწინებით, განსაკუთრებით მნიშვნელოვანია ჟურნალისტების მომზადების გაუმჯობესება, საგანმანათლებლო ინიციატივების გაფართოება და მდგრადი მედიაწიგნიერების პროექტების განხორციელება საზოგადოებისთვის სანდო ინფორმაციის მიწოდების მიზნით.